Ua ōliōli mai le Pelesetene o le Malo o Amerika e feiloa’i i ta’ita’i o Malo o le Pasefika, lea o le a auai ma le Palemia o Samoa i le feiloa’iga ua faatulaga e faia i le masina fou i le maota pa’epa’e i le laumua i Uosigitone.
O feiloa’iga a le sui failautusi o mataupu tau i le va i fafo o lea Malo ma le tamaitai Palemia le afioga Fiame Naomi Mata’afa i le faai’uga o le vaiaso talu ai, na faailoa ai o lea feiloa’iga ua fuafua e faia tonu i le taimi o le fonotaga masani a ta’ita’i o Malo Aufaatasi e usuia i le aai o Niu Ioka i Amerika.
O feiloa’iga ma talanoaga a le tamaitai Palemia o Samoa ma le sui failautusi o le va i fafo o le Iunaite Setete o Amerika ia Wendy Sherman na faamautu ai le toe faaauau o le polokalame o alii ma tamaitai pisikoa a lea Malo lea ua 55 tausaga o agavaa ai pea Samoa. Ua silia i le 2 afe pisikoa Amerika ua galulue i lo tatou atunuu talu mai ia tausaga e tele.
Sa faailoa e le Palemia o Samoa lona agaga faafetai i le sui o le Malo o Amerika i le toe foi atu o lona Malo e opogi ma lagolago le feagaiga i Pale i Farani mo le faaauauina o puipuiga o atunuu mai suiga tetele o le tau aemaise o atunuu laiti e pei o Samoa e ma’ale’ale o latou aafiaga mai suiga o le tau.
Sa momoli ai foi le faafetai a le afioga Fiame Naomi Mata’afa i le agalelei o lea Malo i taumafaiga o puipuiga o le faama’i e pei ona sa aumai ai vailaau mo tuipuipui i le fesoasoani o le COVAX. O Samoa na muamua afea e le tamaitai sui failautusi poo le sui Minisita o le va i fafo o le Iunaite setete o Amerika, i lana malaga taamilo i atunuu o le Pasefika.
