O le aoauli nei lea sa feiloai atu ai le Afioga i le Kovana o Ausetalia David Hurley ma lona faletua faapea le aumalaga faaaloalogia a le Malo o Ausetalia, i le Afioga i le Palemia, Fiame Naomi Mataafa i le faletalimalo a le Taumeasina.
O lenei feiloaiga na auai ai nisi o Minisita o le Kapeneta faapea ai ma le Taitai o le Vaega Faaupufai o loo agaia le Malo, Fonotoe Pierre Lauofo ma nisi o sui a le Malo.
I se saunoaga puupuu a le Palemia i lenei feiloaig na ia saunoa ai i nisi o vaega tāua o faigapaaga a Malo e lua.
“Ou te momoli le faafetai tele i le Malo o Ausetalia e tusa ai o la’u malaga atu ai i le amataga o le tausaga ma maua ai le avanoa e faia ai fonotaga ma le Palemia le Afioga ia Albanese faapea ai ana Minisita o lana Kapeneta ma sui mamalu o le Malo ina ia faatumauina pea le mafanafana o faigapaaga.
“E pei foi ona talimalo ai le Malo o Samoa i asiasiga a nisi o Sui mai le Malo o Ausetalia ia Penny Wong faapea ai le asiasiga a Pat Conroy e toe talanoaina le tulaga i atina’e ma o nei faigamalaga o loo aloaia ai le vavalalata o faigapaaga a Samoa ma Ausetalia i le tele o tausaga.”
Na ta’ua foi e Fiame o Ausetalia o se tasi lea o atunuu o loo aumau ai le toatele o tagata Samoa e le gata i sailiga manuia ae faapea foi i galuega faavaitaimi ma o loo fai foi ma fesoasoani i le atina’eina o le tamaoaiga.
I le asiasiga a le Kovana i le asō i nisi o atina’e o loo fesoasoani mai ai lona Malo na ta’ua ai e Hurley i lana saunoaga le tāua o faigapaaga vavalalata.
“E iai se tasi o vaega na ou talanoa ai i alo ma fanau i atina’e na asiasi atu iai, o le alofa e o lua ma faatinoga a leai ni faatinoga e le mafai ona faataunuuina se galuega o fuafua iai.”
Na saunoa foi Hurley e le o le taimi muamua lenei ua malaga mai ai i Samoa ae o se avanoa tāua lenei ua mafai ai ona toe malaga mai e asia foi nisi o atina’e o loo fesoasoani mai ai lona Malo.
