E 29 fanau sikolasipi a le atunuu lea ua taunuu manuia i Fiti ma na maua ai le avanoa o le Hai Komesina, Afioga Aliioaiga Feturi Elisaia e feiloai ai i fanau nei a o lei amatalia aoaoga i le Iunivesite a le Pasefika i lona lala i Suva.
E pei ona faailoa e le Ofisa a le Hai Komesina a Samoa i Fiti, o le avanoa lea na faailoa ai e sui o le ofisa, tulaga e ao ina silafia e fanau o loo autovaa atu mo avanoa faasikolasipi
nei i le siosiomaga fou o le a aumau ai seia mae’a tausaga faaleaoaoga.
Na faaalia ai foi le finagalo a Aliioaiga o se tasi foi o sui sa a’otauina i lea Iunivesite ma faamanatu ai i fanau aoga o nei avanoa e le faigofie ona maua ma e toaitiiti lava le fuainumera o i latou e faamanuiaina i nei avanoa faasikolasipi.
Na ia lu’i ai fanau aoga ina ia filigā e finau ma tauivi i le aoga ma faamanatu iai o le ofisa a Samoa i lea atunuu ia manatua o lo latou aiga lea, poo ā vaega a o faafitauli e feagai ai, o loo avanoa lava le ofisa e fesoasoani mo vaega e manaomia ai le fesoasoani.
E silia ma le 80 fanau aoga a Samoa o loo aotauina i le Iunivesite a le Pasefika i lona lala i Fiti ma o le aso 17 o le masina lea e fuafua e toe amata ai le kuata lona 2 o aoaoga.
