O le masina o Ianuari o le tausaga fou o le a feiloai ai le Football Ferns le ‘au a Niu Sila ma le ‘au mai le Malo tele o Amerika i totonu o Aotearoa mo le uluai taimi.
O se vaega lenei o le taamilosaga poo le tour a lea ausoka e tapena ai mo le Ipu o le Lalolagi i le tausaga fou.
O ‘au nei e lua ua oo atu i le 20 taimi na feiloai ai i luga o le malae i taaloga faavaomalo peitai o le taimi muamua lenei o le a taaalo ai i totonu o Niu Sila.
O le a faia lea taaloga i Ueligitone i le aso 18 o Ianuari 2023 sosoo ai ma le isi taaloga i totonu o Aukilani i le 3 aso mulimuli ane pe a tuanai le taaloga muamua.
Faailoa e sui o ‘au e lua e tāua tele taaloga o loo fuafua nei iai auā e vaavaai ai poo a vaega e manaomia le toe faaleleia a o lei oo atu i le Ipu o le Lalolagi le FIFA Womens World Cup o le a faia i Ausetalia ma Niu Sila.
