I le maea ona tauaao ai i le Aso Gafua e le taitai o le vaega faaupufai e Puipuia Aia Tatau o tagata o le tusi mai le Fofoga Fetalai e tali atu ai i lana tusi faatatau i le faatautoga o sui o lana vaega faaupufai o le Aso Lua na molimauina ai se feiloaiga a le susuga a Tuilaepa Lupesoliai Sailele Malielegaoi ma nisi o sui o lana vaega faaupufai ma le afioga i le fofoga o le fono.
O se feiloaiga ua faailoa e le Fofoga Fetalai le susuga Papalii Li’o Taeu Masepau na avatu ai ma se faituaga a Tuilaepa i nisi o vaega e faaleleia ai ana tapenaga ao lumanai le tauaofiaga o le Palemene i le Aso 14 o Setema.
Faaalia e Papalii e le’o faatautee le taitai ma le vaega faaupufai a le HRPP i lana tusi ae e iai nisi o vaega ua o latou talosaga atu ai ma ua ave iai lana fautuaga ina ia faapepa ona tuuina atu lea mo sana faaiuga mulimuli ao le’i oo atu i le Aso Lua o le vaiaso fou e usuia ai le fono aoao faitulafono.
O le tauaofiaga i le Aso 14 o Setema o le a folasia ai le tala faatatau autu muamua o le tupe a Le faigamalo fou a le vaega faaupufai o le Faatuatua i le Atua Samoa ua Tasi.
O le a folasia ai foi ma le teuteuga o le tulafono o faigapalota e faasino i fale palota faapitoa mo palota laiti e 7 o le a toe faia e mafua i faaiuga o tagi o faatosina solitulafono o le palota tele ia Aperila.
