Ua mae’a le fono a le Palemia o le malo o Iapani ma ta’ita’i o le Pasefika e pei ona auai ma le Palemia o Samoa, ma o se feiloaiga e pei ona faailoa i lipoti sa talanoaina ai le tele o mataupu, e pei o fesoasoani faasoa a lea Malo i atunuu o le Pasefika mo le itu i le atina’e lautele o le tamaoaiga.
O se tasi o vaega togia o lea fono faaletausaga ua mae’a, o le feiloai atu o ta’ita’i o le Pasefika i le Ao o le Malo o Iapani le Emeperoa o Naruhito.
O le Emeperoa o le Tupu foi lea o le atunuu o Iapani.
O le Palemia o Samoa na muamua feiloai atu i le afioga i le Emeperoa ma lana Masiofo e pei ona faailoa i fesootaiga televavave faaonaponei sa faasalalau ai lea feiloaiga.
Ae i le tatalaina o le paeaiga fou o le Palemene o le Malo Peletania i le vaiaso nei ina ua mae’a le palota tele a lea atunuu, na faailoa e lana Maiesetete le Tupu o Salesa III i lana malelega e tatala ai le paeaiga fou a le Palemene o lea Malo, lona afea o Ausetalia ma Samoa ia Oketopa i le la malaga faatupu muamua talu ona faapaleina e avea ma Tupu o lona Malo.
Se vaega o le malelega a le Tupu o Salesa III na tatala ai le paeaiga fou a le Palemene o lona Malo, na ia faailoa ai le la malaga taualoa i Ausetalia ma Samoa i le masina o Oketopa.
