Ua fautuaina pasese a taavale laiti la’upasese ina ia mataala i le aga’i atu i le Australian Open i Melepone ma totogi o pasese i taxis ma ua valaau foi i le malo ia silasila i se isi faiga taufaavalea fou ua alia’e.
O le sooupu o le kamupani a le 13cabs, David Samuel na ia ta’ua o nisi o avetaxi tuto’atasi e lē o i lalo o se kamupani, ua o latou faaaogā se isi auala fou mo le totogiina o pasese e lē o koneti aga’i i le mita masani ma o lea faiga o le a faaopoopo ai le tau e totogi e pasese.
Fai mai Samuel e mana’omia le taofi o lea faiga ma faia se tulafono ina ia faamuta ai ia faiga.
Saunoa le Premier o Vitoria, Jacinta Allan ua mae’a ona silafia e solitulafono le tapē e avetaxi o mita o taavale.
Ua lapata’i mai la le Premier afai e te faaaogāina se taxi ma maitauina le ituaiga gaioiga lea o faia ai, ia ao mai faamaumauga ma lipoti sa’o loa i le Safe Transport Victoria auā e matua’i lē talia lava ia ituaiga amioga.
O se mataupu ua lē fiafia ai ma nai avetaxi o loo mulimulita’i pea i le tulafono ma ua loa tausaga o tautua, fai mai a latou ua ta’uvalea ai fua ma le auaunaga.
O le Australian Open i le taaloga tenisi e amata i Melepone i le aso 12 o le masina nei.
Puna o Faamatalaga: https://www.9news.com.au/national/taxi-company-warns-against-cowboy-cabbies-ahead-of-the-australian-open/1dbf81f9-fbe9-4f2b-8b32-7f94f5556e60
