Ua tuu atu nei e leoleo i le Loia Sili a le Malo, le taunuuga o a latou suesuega i le tamaitai 24 tausaga le matua lea na saofia ona malaga ese ma Samoa i se malaga a le vaalele o le Fiji Airways.

Ua tuuina atu ia suesuega ma le fautuaga a leoleo e faia ni moliaga o lea tamaitai i lona solia o aiaiga o le Tulafono o le puipuiga o le malaevaalele, faapea le Tulafono o femalaga’iga a Samoa.

E le o faailoaina e le sui komesina o leoleo i le feiloaiga ma tusitala i le Aso Tofi poo a tonu moliaga o le tamaitai, ae e faatoa manino le vala lea, pe afai e talia e le Loia Sili le fautuaga e fua i molimau a leoleo ua faamautu.

Ae i le iloiloga a le Loia Sili i le suesuega a leoleo i le tagi a le Minisita o Galuega tetele faasaga i ni tuuaiga a le taitai o le Itu agai e faasino i se taavale pikiapu o loo faaaoga e le Minisita le tofa Olo Afoa Fiti Vaai, na toe fesiligia le sui komesina susuga Papalii Monalisa Tiai Keti, poo fea ua agai iai le latou fautuaga e faia ni moliaga i le susuga Tuilaepa L Sailele Malielegaoi, ma se tali mai le Loia Sili i le iloiloga faaletulafono.

O le tausaga na tea nei na tuuina atu i le Loia Sili mo se iloiloga lenei mataupu, ae ua faailoa e le sui komesina o leoleo o loo tālia pea se faaiuga o lea iloiloga, pe faamautu le faia ma le lē faia o ni moliaga.

Le susuga Papalii Monalisa Tia’i Keti o le sui Komesina o leoleo i le feiloaiga ma tusitala i le vaiaso nei.