O fesuia’iga o faigāmalo e ulufale atu isi ta’ita’i, ae tuumuli isi ta’ita’i faalemalo, peita’i e tumau lava tagata o faia le tautua ma le auaunaga i le atunuu.
O le feiloa’iga a le Minisita o le Soifua Mālōlōina o le pulegamalo fou ma le Minisita Lagolago mo lea auaunaga tāua a le malo, sa molimauina ai le faatumulia o le potu fono o le matāgaluega i le falema’i autū o Tupua Tamasese Meaole i Motootua i le to’atele o tama’ita’i ma alii tausi soifua.
O se feiloa’iga sa ave ai le faamalo a le minisita le tofa Vaaaoao Salumalo Alofipo i le tautua a tausi soifua e lē faalogologo tigā, ae o lana tuualalo e tatau ona una’i ma tulei malosi i luma le faatinoga o le latou galuega auā le atunuu o loo sulufa’i atu i le fia maua o se fesoasoani i gasegase o le tino.
Le tofa Vaaaoao Salumalo Alofipo o le Minisita o le Soifua Mālōlōina.
