Ua faamauina i Niu Sila le uluai case poo le tagata ua aafia i le Omicron subvariant BQ 1.1 ma ua saunoa ai le epidemiologist o Michael Baker ua alagatatau ona toe foi i nisi o tulaga tau le puipuiga ina ia alofia ai ni tulaga faaletonu e ono aliae i le lumanai ona o le Koviti-19.
Lipotia e le newshub le faasilasilaga mai le matagaluega o le soifua maloloina i le aso ananafi ua taua ai le matauina o le subvariant lea o le omicron i totonu o Niu Sila aemaise foi i le suavai i Waipounamu.
Fai mai Baker ua lua waves o le omicron ua aafia ai le atunuu i lenei tausaga ma e ao lava ona iai pea le taitaiga lea i ni tulaga mo puipuiga e faamanatu ai pea ma fautuaina le atunuu i ia subvariants fou ma aafiaga.
I Europa ua lipotia ai le siitia o tagata aafia i le BQ1.1 ma e mo le taimi nei e pei ona faailoa i le pepa o faamatalaga mai le soifua maloloina, e le o iai ni faamaoniga o ta’ua ai e ogaoga atu nei subvariants nai lo le vairusi masani o le omicron o loo aafia ai le toatele.
