Ua tele ni fautuaga ua tuuina atu i sui o femalaga’iga e faaaogā ai nofoaafi, ina ia faia loa ni auala e okometi ai ona taofi le alu o le nofoaafi, talu ai se matāupu na tula’i mai i le tausaga e 2024 lea na toe toe lava a feto’ai ai se nofoaafi ma se taavale ona o le lē tū o le nofoaafi i mōlī mūmū.
Faamauina i ripoti a le RNZ, i sa’ili’iliga a le vaega o le Komisi o su’esu’ega i faalavelave tau femalagaa’iga, le Transport Accident Investigation Commission, na o latou maua ai e lē tasi pe lua taimi na lē tū ai le nofoaafi i le taimi e tatau ai ona tū i Kereone e lata i Morrinsville.
O le mea mata’utia na o latou maua, na ala ona tula’i lea faafitauli ona o le faatamala o lē na aveina le nofoaafi o loo su’esu’eina, e faapea ua mua ona ano i lana telefoni feavea’i ae galo ai ona tū i mōlī mūmū e pei ona tatau ai.
Faamauina e vaapiapi sina avanoa na mafai ai ona taofi ae semanū e telē se aafiaga ma oo i se tulaga faalētonu, e faapea e na o le tolu lava ma le ‘afa minute na mafai ai ona tū le nofoaafi ma misi ai le taavale na semanū la te feto’ai.
Ta’ua e le ‘ausu’esu’e na o latou iloilo uma vaega e aofia ai ma faailoilo poo le signalling system, ma o latou faaalia ai sa lelei uma faailoilo e leai foi la se tulaga na aafia ai le lē mafai ona tū o le nofoaafi.
Faaopoopo o le faatamala lava o le avenofoaafi, ma lona lē faafoeina lelei o lea auala o femalagaa’iga aemaise lona lē tausisia o tulaga e tatau ai ona faatino le galuega, e pei o le alu lava o le nofoaafi e aunoa ma le faatagaga ma le saoasaoa tele e pei ona faamauina na oo atu i le 2 kilomita le mamao na oo iai mai le itu na tatau ona tū ai.
I le ripoti a le Komisi su’esu’e na faailoa ai le alu alu i luga o le numera o matāupu o le solia o aiaiga o faailoilo.
Faaalia e le TAIC, o le taimi lenei o loo faalagolago lava le tele o faamaumauga ma auala o puipuiga (safety systems) i tagata ma ua o latou fautuaina malosi ai le KiwiRail ina ia taga’i e faatino ni auala o puipuiga faainisinia ma tilotilo i ni auala e taofi ai nei faafitauli mai le tula’i mai, e pei o le iai lea o ni taofi e okometi ai ona tū le nofoaafi i mōlī mūmū, ina ia ‘alofia ai le tupu mai o ni faalavelave mata’utia.
Puna o Faamatalaga: https://www.rnz.co.nz/news/national/591300/kiwirail-urged-to-implement-automatic-stops-for-trains-that-run-red-lights-after-near-miss
