O le lipotia ai o le vaaia o le manulele a Samoa le lupe o le Manumea i taumafaiga e faasao ona ua tau lē maua, ua toe aumai faalauaitele se tala’iga a le sosaiete o le faasao le Samoa Conservation Society, ua talosaga ai pea i le atunuu ina ia taofi le fasimateina o le Manumea i laau malosi.

O le Manumea ua avea nei ma manulele a Samoa poo le tatou National Bird i se taumafaiga e faasao ina ia toe faateleina ma ua na o Samoa foi o loo maua ai.

I se faasalalauga a le sosaiete i auala o fesootaiga faaonaponei le social media o loo faailoa ai le galulue ai o le aufaigaluega e sailia le Manumea i laufanua o le atunuu, ma ua tuuina atu ai ma ata o le Manumea ma faamatalaga mo le silafia e le lautele o foliga vaaia o le manulele.

I le faamatalaina o foliga o le Manumea o loo ta’ua ai e pau lea o le manulele o le ituaiga o lupe e pi’o i lalo le tumutumu o lona gutu o loo maua i Samoa.

O ona fulu e suia mai le manulele laitiiti i lona lanu enaena (rusty) i lona tino atoa.

A oo ina matua ua suia lanu o lona fulu i le lanu olive meamata poo le moana i lona tua ma le manava.

O ona apa’au e lanu mūmū ma lona gutu e lanu samasama.

Ua logoina le atunuu e fesootai i le sosaiete o le faasao a Samoa poo le Matagaluega o Puna’oa Faalenatura ma le Siosiomaga ina ia auina atu le aufaigaluega mo se gaioiga talafeagai pe a latou vaaia le Manumea i vaomatua ma fanua tu uta o le atunuu.