Ua aumai faalauaitele i le vaiaso nei e le vaega o le vaaitau i Samoa se lipoti o le vaai mamao i le tulaga o le ulufale atu o le atunuu i le taimi lenei o le tau o afā, ma ua faailoa mai ai e tatau i lo tatou atunuu ona nofo silafia faamatalaga o loo i lea lipoti e faaaogā ma le faautauta auā tapenapenaga a nuu ma afioaga faapea aiga taitasi a o agai atu i le vaitau afā.
Ua fautuaina ai tagata ina ia mataala ma nofo sauniuni ma ia faaaogā tatau faamatalaga aloaia ma utagia fautuaga ma lapataiga e tuuina mai mo le saogalemu lautele.
I le lipoti a le vaaitau i le vaiaso nei ua faailoa ai, Ua siitia le tulaga lamatia o Samoa mai i Matagi Afā, ma ua faapea ai le vaai mamao, e Lua i le Tolu (2-3) Matagi Afā e ono alia’e ma pāsia, pe sopo’ia foi le 400 kilomita i fafo atu o Samoa i lenei Vaitau Afā.
E iai le avanoa e ono laasia ai e nisi o nei Matagi Afā le Vaega Tolu (3) pe sili atu foi.
O le Vaitau Afā e amata mai ia Novema 2023 seia pā’ia Aperila 2024.
O le masina o Ianuari agai atu ia Mati, o masina aupito i sili lea ona ma’ale’ale i le afuaga o Matagi Afā mo Samoa.
O le taimi nei, o loo feagai le Vasa Pasefika ma aafiaga o le Ele Nino, ma maualuga se avanoa e faaauau pea nei aafiaga i le faasolo atu i le amataga o le 2024.
O loo valoia le faaitiitia le faitau aofai o timu faamauina mo Samoa i le 6 masina o amatalia nei.
E ono siitia maualuga vevela o le ‘ea nai lo o tulaga masani mo Samoa mo le vaitau Afā.
E maualuga se avanoa e aafia ai Samoa i aafiaga tau Lāmala (Tu’iēfu), aemaise lava i nofoāga ma’ale’ale i nei mala faalenatura.
Vaai Mamao i le Vaitau mai i le masina o Novema 2023 e agai atu ia Aperila 2024.
O le a tumau pea ona vaaia aafiaga o le Ele Nino mo Samoa ma le Vasa Pasefika atoa.
O le faatupulaia ai o le vevela o ogasami i le ogatotonugalemu ma Sasae o le Vasa Pasefika, e mafua ona o le vaivai o savili masani o le Tuā’oloa (savili mai Sasa’e).
O le taoto ai o ogasami vevela i lea vaega o le Vasa Pasefika ua faaigoaina o le Ele Nino.
A tusa o le vaai mamao ua iai nei, o loo maualuga le avanoa e faaauau pea le Ele Nino mo le Vaitau atoa, ma e faapea foi le aafiaga o le Tau o Samoa.
O le faaumiumiloa o uiga nei i le agai atu i le 2024 o le a aafia ai Samoa i le maualalo o le faitau aofai o timu maua, ae peitai e siitia le numera o Matagi Afā e afua ma latalata mai i le atunuu.
