O se fono o le a sosoo ai nei a le Komiti tele o polokalame o le 60 tausaga o le Tuto’atasi o loo ta’ita’ifono ai le Palemia, e tatau ona ma’oti ai se faai’uga i le polokalame o Tuugavaa e aofia ai Fautasi, Tulula, Vaaalo, ma Paopao.
Ua faailoa e le Palemia ina ua fesiligia i le fono ma tusitala i le Aso Lua, ua avatu le fautuaga a le soā komiti o loo tapenaina tuugavaa ma ua avatu ai le tuualalo e faaauau lea polokalame ae taatia atu i le taualuga o polokalame uma i totonu o le 12 masina lea e faamae’a i le faai’uga o Me o le tausaga fou 2023.
Na maua se fesoota’iga i le Komesina o leoleo i le po anapo o ia o loo ta’ita’ifono i le soā komiti o tuugavaa ma faailoa mai ai, o le fono sa tāloina i le Aso Faraile na te’a nei na fausia ai le fautuaga ua i luma nei o le komiti autu o polokalame o le onosefulu tausaga o le Tuto’atasi.
Na faaalia foi e le Komesina le susuga Auapaau Logoitino Filipo e le’i toe maua atu lava se faaaliga pe iai nisi fautasi e fia lesitala ae o le tolu o fautasi na tapuni le lesitala ua faaoo atu lo latou fia auai, o le Tolotolo o Tama Uli mai Salelologa i Savaii, o le Segavao mai le a’oga o le Don Bosco ma le fautasi a le kalapu taalo a le Malisi Sagato Iosefo.
