Ua i luma nei o le malo o Ausetalia se fautuaga malosi mai le itutino o loo faamaopoopoina iuni a tagata faigaluega i atunuu o le Pasefika e aofia ai ma Samoa, ua ave ai se tuualalo i lea malo ina ia silasila ane e toe faaleleia nisi o aiaiga mo galuega faavaitaimi i totonu o lea atunuu.

O le tatau ona maua o itula faigaluega e 30 i le vaiaso o se tasi lea o fautuaga ona o se tasi lea o faafitauli ua feagai ma tagata faigaluega faavaitaimi i Ausetalia, o le itiiti o itula faigaluega ma ua lē lava ai seleni e maua e totogi ai nofoaga o loo faamautū ai, faapea se seleni e lafo i aiga.

Ua fautuaina foi le tatau ona iai se aiaiga i visa faigaluega e mafai ai ona suia i se isi galuega i se faato’aga pe a alu alu faaitiitia aso faigaluega i le galuega na sainia ai le konekarate.

O se suiga faapea o le a mafai ona fesoasoani ai i tagata faigaluega faavaitaimi e 7 pe iva masina le konekarate, e maua ai nisi galuega e siitia ai itula faigaluega ma lelei ai faamanuiaga tau tupe e maua i totogi.

Ua fautuaina foi le faaleleia o aiaiga mo le avanoa e maua i togafitiga faafoma’i a o toesea mo ia galuega, ma le tasi o fautuaga o lafoga ina ia iai le filifiliga i le tagata faigaluega i se auaunaga tuma’oti na te faatumuina a latou pepa mo lafoga e toe maua poo tax returns.

O le faatalanoaina o aiaiga o konekarate i le va o i latou e ana galuega ma tagata ua manuia talosaga i ia galuega, ua fautuaina e tatau ona iai ma se sui o le iuni a tagata faigaluega i lea vaega tāua, ina ia malamalama atili ai tagata faigaluega a o le’i sainia a latou konekarate.

O le faaaogāina foi o le gagana Peretania ma le gagana Samoa faapea gagana a isi atunuu o loo i totonu o le polokalame ua tatau ona tusia ai pepa uma o faamatalaga o galuega ina ia manino ma malamalama tagata o le a maua ia galuega a o le’i tuua o latou atunuu.

O sui o le Malo o Samoa sa auai i le fono faaletausaga sa talanoaina ai faafitauli ma aiaiga o ia galuega o le Minisita o Leipa ma le Minisita o Tupe ma ofisa sinia o ia matagaluega e lua a le Malo o Samoa.