Ua fautuaina tagata Niu Sila e tapena i le faaletonu o le tamaoaiga.
O se fautuaga ua sau ai i le mae’a lapatai mai o le faletupe a le lalolagi poo le World Bank i le aafiaga tele o iai nei le taugata o le soifuaga e faatusa i le pa’ū o le malosiaga o le tupe.
Mo tagata Niu Sila o le fautuaga e tapena mo le recession lona tolu talu mai le 2009.
Ua maua foi i faamaumauga e le o tuumamaina e tagata Kiwi le faaalu o tupe i faatauga e pei ona molimauina i le uluai vaiaso o lenei tausaga, e 1.6% e maualuga atu ai tupe faaalu na i lo le 2022.
I vaaiga mamao i tamaoaiga o maketi tetele ua iloa ai foi le tau fai sau i lalo o Amerika, Saina ma Europa.
Ae i totonu lava ia o Niu Sila o interest rates poo tului lea o loo mafuli iai le popole o tagata suesue tau i le tamaoaiga.
O tului lava foi nei o loo fesoasoani i le faaletonu o tamaoaiga o le toatele o atunuu e le na o Niu Sila, faaopoopo iai ma le taua i Ukraine aemaise le Koviti.
