Ua iai se faamanatu ua faailoa mai i lipoti i luga o upega tafailagi i le asō i nisi o auala e mafai ona malupuipuia ai a latou meli poo afifi e kiliva atu i o latou fale ma tuatusi aemaise o le faateteleina o lipoti i le tele o afifi e gaoia mai fale o aiga pe a mae’a ona kilivaina iai.

O se lipoti ua faailoa ai le toatele o tagata ua aafia i ia foi ituaiga solitulafono ma ua faailoa e nisi o le tele o tupe e faaalu i le totogiina o le kiliva ma le faatauina o le oloa ae iloa ane ua gaoia ina ua taunuu atu i fale, o se tulaga faanoanoa tele lea.

Fai mai la se faamanatu mai nisi ua loa tausaga i le auaunaga lea, e lelei pe a faamautu o loo kiliva sa’o lau afifi i se nofoaga o loo e faigaluega ai aemaise lava i se ofisa e iai ni o latou pusameli.

Fai mai a latou o le auala aupito saogalemu lea. O se tasi faamanatu o le faaaoga lea o le tracking ma ia faamautinoa e filifili le option e saini ai e oe le afifi pe a kiliva atu ae afai e te le iai i le fale e mafai ona e valaau i le vaega e feagai ma le kiliva e toe fetuunai ai taimi.

O le isi fautuaga o le faapipii lea o ni meapueata i faitotoa o le fale ma afai e maua i ia videos le augaoi, ia faasoa loa i luga o upega tafailagi o latou ata ina ia vave ai ona fesoasoani i suesuega a leoleo ma toe maua ane ai au afifi poo faamomoli foi.