E lē fesiligia le tāua tele o faalauiloa a le auaunaga o le soifua maloloina e faatatau i faama’i eseese ma le tāua o puipuiga aemaise togafitiga.
E faapena foi i faalauiloa e faasalalau ai fautuaga i le tāua o le suasusu o le tina e fafaga ai lana pepe, e pei ona faatāua i lenei vaiaso, ma ua ave ai le tuualalo a le Minisita i le pulega ia silasila o se isi faalauiloa ia ave i nuu ma itumalo, ae lē o le toe faalauiloa i tagata o le matagaluega.
O le motu tele i Salafai na faia ai le faalauiloa o le vaiaso o le faasusuina o pepe i suasusu o o latou tina, o se taumafaiga faifai pea a le matagaluega o le soifua maloloina e unaia ai tina talavou ma tina ua faasolo ina matutua e aua le faaaogāina apa susu pauta poo pepa susu, ae faaaogā ona lava suasusu e sili ona saogalemu ma ola maloloina ai lana pepe.
Le afioga Valasi Luapitofanua Toogamaga Tafito Selesele, o le Minisita o le Soifua Maloloina i le tatalaina o le vaiaso o le faatāuaina o le faasusu o pepe i suasusu o tina.
