E toatasi se taulealea talavou 16 tausaga ua maliu, ae manu’a le isi alii 15 tausaga le matua, ina ua solo iai se sitepu simā o se fale tuufua.
Faaalia e le Komesina o leoleo o i laua ia sa fai se la galuega o le la’uina o le oneone ma o le taimi sa malolo ai i lalo o se fale tuufua e iai ma le sitepu sima na tulai mai ai ma le faalavelave na tupu i le afioaga o Asau i Savaii.
Ua faailoa e le Komesina o leoleo, ua mae’a sailiiliga i le mafuaaga o le faalavelave ma ua faamalieina le pule o maliu poo le coroner ma ua le faia ai se taotoga faapitoa.
O le masina o Tesema ua faatulaga e faia ai le suesuega o le maliu lilo poo le inquest, o le a valaau ai molimau e faamatala le atoaga o le mea na tupu ma faamautu ai le mafuaaga o le maliu.
I se isi o lipoti mai leoleo, o le Aso Lua a sau e tulai ai i le faamasinoga le tamaitai o Lyn Nauer mai le afioaga o Laulii, e tali i moliaga o lona maua o ni tupe i ni auala taufaasese.
O loo nofo taofia lē ua molia i le vaaiga a leoleo, ae ua ave le faafetai a le Komesina o le matagaluega i alii ma faipule o Laulii ona o le logoina o leoleo, na faigofie ai le galuega sa tau sailia ai lea tamaitai.
E toavalu ni tagata na ave a latou seleni i le tamaitai ma le faamoemoe e maua ai ni o latou avanoa i galuega faavaitaimi, peitai e lei taunuu ia fuafuaga, ma ua le toe maua a latou seleni.
