E to’alua ni faifaiva na aga’i mo so la faiva, e tau sa’ili ni ūlā sami, ma le lē iloa o le a fetaia’i ma faafitauli.
I lipoti mai le RNZ, na faamauina ai le valaau ane o sui o le vaega o faalavelave poo le toe 20 minute i le itula e 2 i le aoauli o le Aso Lua o lenei vaiaso; ina ua lē toe foi ane i la’ua nei i le pa’u mātū.
Ma o lea na faatino ai loa se galuega poo se operation a le vaega a le Coastguard Hawke’s Bay e tau sa’ilia le itu ma lavea’i mai ia faifaiva.
E tusa ai ma lipoti, poo le 10 minute e te’a ai le itula e 3 na maua ai le tasi o tagata ma na aumai ma le saogalemu i uta mo iloiloga faafoma’i.
Ta’ua e le’i umi lava ae maua loa le isi o faifaiva, e faapea e maua atu ua lē iloa se mea, ma sa taumafai sui o le Coastguard e faatino gaioiga e faasaoina le soifua o lea tagata ae pagā lea e le’i manuia.
Ua faamaonia e leoleo, o le a tuuina atu le tino maliu i le pule o maliu poo le coroner, a o faatino su’esu’ega a leoleo i itu ma vaega uma o lenei matāupu.
Puna o Faamatalaga: https://www.rnz.co.nz/news/national/576570/one-dead-after-failing-to-return-from-crayfishing-trip-off-napier-coast
