O se tina 40 tausaga lona matua o lana fanau e faamautu i Ausetalia, ua faasala nei e tuli le lua tausaga ma le fā masina i le falepuipui, ina ua faamaonia lona moliaga o lona maua o se tupe mai ni gaioiga solitulafono.

O le tina o Catherine Tafa Faalogo o Levi Saleimoa na ia faasese se ulugalii mai Farani na malaga mai e tafafao i Samoa.

O le masina o Iuni o le tausaga nei na taunuu ai le ulugalii i le malaevaalele, ma a o faatali se alii o se faletalimalo poo se resort i ana malo na malaga mai i le vaalele, ae o le taimi lea ua feiloai ai Catherine ma le ulugalii mai Farani ma amata loa ona talanoa faafoliga o ia e faigaluega i se faletalimalo.

Na ia ave le ulugalii i le nofoaga o loo tutu ai taavale a faletalimalo o loo faatali a latou tulisi, ma ia faataga vili le telefoni e foliga o loo talanoa i se faletalimalo mo se potu o le ulugalii.

Na mae’a ona ia tapa loa le o le totogi amata e 400 tala ma le faaupuga se’i taunuu le latou malaga i le faletalimalo ona maua lea o le lisiti a le ulugalii.

Na faanoi le tamaitai i le ulugalii e iai se feau tāua e fia alu iai, ae o le gaioiga lea na sola ese ai loa.

O le itu lelei tele na pue e le ulugalii le ata o Catherine lea na ave i leoleo ma faia ai sailiga ma maua, faia ai loa ma moliaga.

O faamaumauga a leoleo sa tuuina atu i le faamasinoga o loo faailoa ai nisi o solitulafono faapea a lea tamaitai sa faamaonia ma nofosala ai foi i le falepuipui.