Ua faasala nei i le to’ese se faipisinisi e suafa Ashik Ali mo le 3 tausaga i le moliaga o le fasioti tagata pa’ivalea – manslaughter i le maliu ai o Jonathan Walters, o se tagata faigaluega a le Downer ina ua lavea faafuasei i se loli tele a le kamupani a Ali.
Faaalia e oo atu lava i le 20-tone le mamafa o le loli na aafia ai Jonathan, ma e ta’ua na mafua ona aafia lē ua maliu ona o le lē lelei o taofi o le loli.
Faamauina o lenei mataupu na tulai mai i Victoria Ave, Remuera, i le masina o Me 2024, na omia ai lea alii a o faatino sana galuega i lea faaitu.
E tusa ai ma ripoti, sa lē tatau lava ona toe faaaoga pe toe fealuai lenei loli, ona o tulaga lē saogalemu ua iai; peitai o lea lava na faaaoga ma iu ai lava ina aafia ai le tagata.
I faamatalaga e tusa ai ma lea loli, na faalua ona pelogia e Ali le NZTA, o le a ia aveesea le loli mai le toe faaaogaina, ae pagā na te le’i savali i ana faamatalaga.
O le po na tupu ai le faalavelave, e faapea na tu le lolii i luga o se a’ega, na faafuasei le solomuli o le loli ma o ina na lavea ai loa Walters. Faamauina na faaauau ai pea ona alu le loli, pe a ma le 400 mita le mamao na agai ai faatoa tū, ae na maituina le faaleagaina ai o nisi o poumoli ma se laau i lea loli.
Faaalia e le faamasino, Justice Graham Lang, o se faalavelave matautia tele, ma o mataupu sa lē tatau lava ona tupu. Na ia ta’ua foi sa ia Ali le malosiaga e na te taofia ai le toe faaaogaina o le loli, se manū e faasaoina le ola o sia tagata, ae pagā na te lei faia ala e tatau ai i le puipuia o soo se tasi i luga o le auala, ae faapea le tau’aveina o lenei loli.
E le gata i le fgalepuipui ai o lea alii ua faamauina le faatonuina e le faamsino Ali ina ia totogi atu le 20,000 e tuuina mo le aiga a Walters.
Puna o Faamatalaga: https://www.stuff.co.nz/nz-news/360892194/needless-death-business-owner-jailed-after-unsafe-truck-killed-roadworker
