O le Aso Toonai na te’a nei na faamavae atu ai le Malo i se tasi o ta’ita’i o le atunuu, o se faipisinisi iloga foi ua tele tausaga o lana tautua i le tamaoaiga o Samoa le susuga George Michael Lober.
Sa avea o ia ma sui faipule mo nofoa o le au palota taitoatasi i taimi o paeaiga faapalemene sa iai ia nofoa mo tagata Samoa e iai piitaga tau toto i isi tagatanuu.
O le taimi o paeaiga tai tolu tausaga a le Palemene mai le tausaga e 1979 i le 1988 na avea ai o ia ma faipule o le fono aoao faitulafono.
O le paeaiga o le tausaga 1985 i le 1988 na avea ai ma Minisita o le kapeneta mo le Matagaluega o Faamasinoga ma le Matagaluega o Leipa.
O ia foi o se fai pisinisi iloga e pei ona tuumalo o loo ia umia ma faagaioia le kamupani o le Salafai Metal Industry poo le SMI.
O le afioga i le Ao o le Malo ma lana Masiofo sa auai i ona toe sauniga faalemalo, lea sa auai foi le afioga i le sui o le fono a sui tofia ma lona faletua, o ta’ita’i o le Malo ma pisinisi faapea le tamaitai Palemia le afioga Fiame Dr Naomi Mataafa sa ia faia le molimau a le Malo ma tauaao foi le faaaloalo maualuga o le tagavai i le faletua ia Kueva George Michael Lober.
E tuumalo lea tamalii ua 78 tausaga o lona soifua.
