Ua faitioina le pulega a le matagaluega a le soifua maloloina i le leai o sana faaiuga ia Middlemore ma ona tagata faigaluega.

E iai nisi o le aufaigaluega i le falemai a Middlemore i Aukilani ua toe molimau i le leai o se faatatau o faia e le pulega a le Te Whatu Ora i le lē lava o moega i le falemai, toagaogao le aufaigaluega e faatusa i le pisi tele, aemaise o le uumi o itula faigaluega.

Ua tuuaia ai le pulega, o lea lava e na te silafia le mea o loo tupu peitai e foliga mai e le o iloa poo le a le mea o le a fai, ae pe faafefea foi ona foia le faafitauli.

O le vaiaso nei na sau ai i tua le lipoti e faatatau i le lē saogalemu o le ED poo le Emergency Department e le gata mo gasegase ae faapea le aufaigaluega.

Ae i se tali mai a le pule sili o le Te Whatu Ora, Margie Apa e pei ona lipotia e le leitio a Niu Sila, e lei manino mai ai poo le a se gaioiga ua faia i le toagaogao o le aufaigaluega.

A o tali mai ai le pule sili o loo galulue ma le malo i itu e saga faaleleia ai, ae foliga mai e le o mafai ona faamaonia e sui o le aufaigaluega.