Ua osofai i faamatalaga a le itu agai i Vitoria le premier o le setete Daniel Andrews ona o lona le sa’o i le mataupu o lana malaga i Saina.
Fai mai lipoti o le uluai taitai lea mai Ausetalia o le a ulufale atu i Saina talu ona mae’a le sainiga o le AUKUS agreement lea e le o fiafia iai Beijing fai mai o se faamatau lea i le filemu o le itulagi.
Fai mai Andrews e ui o lana malaga e vave lava peitai e tāua tele. Fai mai sui o le Liberal e tāua le sa’o o le premier ma e fia iloa ma malamalama tagata Vitoria poo ai o loo talanoa atu iai lo latou premier ae pe aisea foi, e le gata i lea poo le a sona aoga mo Vitoria.
E fa aso o le faigamalaga ma o le a feiloai ai le premier ma sui sinia o le Matagaluega o Aoga ma sui o le faigamalo a Beijing e faatalanoa ai le toe agai ane o tamaiti aoga mai Saina mo aoaoga i le setete o Vitoria.
