Ua silia ma le tasi afe tagata Kiwi ua pipii igoa i le lisi faatalitali e fia maua ni a latou kopi o le tusi a Prince Harry, le Spare.

O le aso a taeao e faatoa faailoa aloaia ai peitai e oo mai ananafi ua molimau mai faletusi tetele i Aukilani, Ueligitone ma Kalaiesetete i le toatele ua faato’ai atu e fia faitau i le Spare.

I faletusi a le city council na o Aukilani e 888 i latou ua tusia o latou igoa e fia faitau i le tusi, e ese ai le isi 34 e mananao i kopi o CD.

I Ueligitone e 174 o loo faatali i le tusi, Kalaiesetete e 255 ma le toalima i Whangarei.

Ua ripotia e le Stuff i faletusi i Hamilton o lea foi ua iai tagata ua faia a latou oka, peitai e le o mafai ona taofi se tusi ona e lei taunuu mai.

O le tusi lenei o loo toe faamatala ai e Prince Harry feeseeseaiga ma lona uso matua faapea le tele o mea sa tutupu i totonu o le aigatupu, ma o se tusi ua tele iai tala i luga o le social media i le taimi nei.