Ua taula’i nei le silasila mamao a le pulega o le Iunivesite Aoao o Samoa i le faitotoa ua matala mai e siitia ai le a’oa’oina o tomai faatekonolosi i auala o fesoota’iga televavave i totonu o le iunivesite, faapea le faaooina atu o lea auaunaga mo galuega a le iunivesite aoao, ina ua mae’a faamautū ai nei se maliega ua sainia ma le kamupani o laina o fesoota’iga i lalo o le sami, le Samoa Submarine Cable.
I se pepa o faamatalaga ua faailoa ai o le maliega ua sainia i le va o le kamupani ma le tama’ita’i pule o le iunivesite le afioga Tuifuisa’a Patila Amosa ua saga faamautū ai foi le tulaga maua pea o ia fesoota’iga auā le tautua a le iunivesite aoao a Samoa ia i latou o a’ooga ai, aemaise o galuega faatino mo le siitia o lea auaunaga faatekonolosi.
