Ua afea le matagaluega o leoleo, falepuipui ma le toe fuata’ina i le agalelei ma le loto alolofa o nisi o tagatanuu o Saina o loo aumau i Samoa, ma latou tauaao atu ai i le matagaluega se meaalofa tupe e lima afe tala.

O le foai e pei ona faailoa i le auala o fesootaiga a le matagaluega i le api o foliga ua tauala atu ona o le malu o le Malo ua maliu le susuga i le leoleo satini o Peniamina Perite.

Ua faaopoopo atu i le foai tupe mai nisi o tagatanuu o Saina o loo faamautu i Samoa ni alo se toalua o se leoleo o le Malo o Ausetalia o loo galue i Samoa o Detective Superintendent Daniel Evans, sa faia se la faaaloalo mo le malu o le Malo ua maliu.

O lea faa’alo faaaloalo sa faatino i luma ane o le ofisa autu o le matagaluega o leoleo i Apia, lea o loo iai se ata o le malu o le malo ua maliu ma o loo siomia foi lea ata i pale ma teu fugalaau.

Ua momoli ai le faafetai a le Komesina ma le pulega o le matagaluega i le mafutaga a tagatanuu o Saina o loo aumau i lo tatou atunuu, faapea alo e toalua o le alii leoleo Ausetalia ona o le faaaloalo maualuga ua afea ai le matagaluega ona o le valevale alofa i le leoleo satini ua maliu le susuga Peniamina Perite.