E tele miliona e le toe maua e Niu Sila ona o le faasā mai e Amerika o nisi o i’a o loo auina atu i fafo.

E pei ona auina atu i tala fou ananafi le taofia mai e Amerika o i’a mai ituaiga e 9 e mafua i le talosaga na talia e le faamasinoga o i’a nei o loo aafia ai Maui Dolphins, ma i le silasila a le faamasinoga e le o lelei taiala o loo limataitaiina ai le fagotaina o le gataifale.

A o faatali ai i se tala mai le malo faapea nisi teuteuga e tatau ona faia e Niu Sila, e le talitonu le pule sili o le Sea Shepherd o Michael Lawry o se faaiuga e tatau pe a fua lea e lei iai lava se Maui Dolphin ua mate ona o nei fagotaga talu mai le 2003.

Mai le Seafood NZ, e le talitonu foi i le sā ua ta’u mai ona o lea o loo iai lava meapueata i luga o vaa fagota uma ma o loo lelei ona mata’itu.

E ui i nei finauga, e le mafai e na o ni manatu ona suia ai le faaiuga a le faamasinoga a Amerika seia vagana ua faamalieina ua iai se teuteuga i tulafono o loo fagotaina ai le ogasami atoa ai ma le malu puipuia o Maui Dolphins.

I se faamatalaga mai le matagaluega o loo gafa ma le fagotaina o le gataifale i le vaai faavaomalo, le Ministry of Primary Industries, o lea ua galulue nei ma le malo o Amerika.

Ae afai ae faaumiumi le sā a Amerika, e tusa ma le $200 miliona tupe e le toe maua a Niu Sila.