O loo iai le popolega o fesootaiga ma kegi lea o loo taofia ai tagata o loo fia omai e aumai faamatalaga i tagata e toalua na fasiotia i Hawkes Bay.
O le talitonuga lea o leoleo a o faasolo ai pea le suesueina o le tamaitai na susunu i totonu o le taavale i Havelock North ia Setema o le tausaga nei, faapea ai ma se tasi na maua i le auala i Flaxmere i le 2018.
Na ta’ua e leoleo o le maliliu o i laua nei e toalua e le fesootai, peitai e foliga mai ona o piitaga ma kegi ua faafaigata ai ona maua ni molimau.
E oo mai i le taimi na tuufaatasia ai tala o le taeao, e lei manuia lava sailiiliga a leoleo e ala i le sailia o ē na faia poo le maua foi o nisi e fia molimau, ma ua toe valaau mai ai aiga faanoanoa faapea ma le ofisa i nisi o loo silafia nisi faamatalaga ina ia fesootai atu.
