Na oo i le komiti tau faamasinoga mo le nofoia o fale mautotogi poo le Tenancy Tribunal, le finauga a se ulugalii mai Lower Hutt sa nonofo mautotogi ma le tagata e ona le fale mautotogi, ina ua finau lē ana le fale poo le landlord, e le’i faamaoni le ulugalii i le lē faailoaina e iai se la ta’ifau o loo tausi i le fale ina ua sainia le maliega mo le nofoia o le fale mautotogi.
O se ata video na aliali ane i le social media a lea ulugalii na iloa ai e le landlord o loo iai se ta’ifau o loo tausi ai i le fale ae aunoa ma se faatagana na iai, o iinā na faamaonia ai ni masalosaloga sa iai i le landlord i le manogi se’i tulou sa sosogi ai e foliga e iai se ta’ifau o loo faainaelo ai totonu o le fale ma ua leaga ai le manogi o le kapeta se’ia oo lava ina moomia ona toe sui le kapeta.
I se faatalanoaga a le tama’ita’i faasalalau a le Newstalk ZB, Heather du Plessis-Allan ma Mike Thornton o se alii loia e faapitoa i matāupu o tagata e nofoia fale mautotogi ma i latou e ona fale, na faatalanoa ai pe sa talafeagai le faaaogā e le landlord o faamatalaga na ia maua mai luga o le social media a le tagata mautotogi, ae pe le’i solia ai le tulaga o matāupu faalilolilo poo le privacy o le tagata mautotogi.
Na ta’ua e Thornton, o loo manino ta’iala i le upega tafa’ilagi a le Privacy Commissioner i mea e mafai e le landlord ona faaaogā ma mea e lē mafai ona ia faaaogā mai le social media a le tagata mautotogi.
Ae i lea matāupu o lea sa i luga lava i le fola faalaua’itele le faasilasilaga “Happy One Year my Rockie”, o iinā na iloa ai e le landlord o lea sa iai le ta’ifau na fai lona asofanau, ma sa mafai loa e le landlord ona ia faaaogā lena faamaoniga e molia ai le ulugalii.
O le faaeteetega e pei ona saunoa Thornton, ia aua ne’i taumafai le landlord e sa’ili ni faamatalaga mai se social media a le tagata mautotogi o loo poloka pe lē o tatalaina faalaua’itele, ma solia ai lona privacy.
Ae ona o lea lava sa faasalalau faalaua’itele e le ulugalii le asofanau o le la ta’ifau, ua mafai ai e le landlord ona faaaogā nei faamatalaga poo public informations mo latou su’esu’ega.
O le i’uga o lea matāupu, na faia’ina le finau a le ulugalii, ona o lea sa la ta’utino i le amataga o le feagaiga mautotogi e na o la pusi o loo iai, ae semanū o lea na tausi ai ma le ta’ifau, ma ua la solia ai le feagaiga mo le nofo mautotogi.
Puna o Faamatalaga: https://www.newstalkzb.co.nz/on-air/heather-du-plessis-allan-drive/audio/mike-thornton-solicitor-on-the-lower-hutt-couple-who-refused-to-disclose-they-had-a-dog-to-their-landlords/
