Ua amata nei sailiiliga ma su’esu’ega a le Matagaluega o Leoleo i le maliu ai o se tasi o malu o le Malo i le falema’i i Tuasivi i le faai’uga o Iulai.
I lipoti a le Samoa Global News na ta’ua ai e le afioga i le Komesina o Leoleo Auapaaau Logoitino Filipo o loo faia su’esu’ega ma na iai talitonuga sa tula’i mai ni faiga solitulafono i le maliu ai o lea leoleo (foul play).
O le alii o Tavita Vili mai Safotu i Savaii ua 5 tausaga talu ona faigaluega i le Matagaluega ma o le Ofisa i Fagamalo na galue ai.
Ta’ua e Auapaau i le taimi na logoina ai Leoleo i le mataupu, ua tuuina atu e le aiga lona tino maliu i se tasi o falemaliu peitai na faatonuina ina ia ave le tino o Tavita i le falemaliu i Tuasivi.
I lipoti a leoleo e talitonu sa faasuāavā le alii leoleo ua maliu nei ma sa iai i lona lava fale i le afiafi o le Aso Toonai ae lē gata i lea sa iai se faalavelave na ta’ei ai tioata na manu’a ai.
O le tugā o manu’aga i lona ulu na uma ai le ola o Tavita ona ua lē mafai iai se togafitiga.
