O se taimi e le’o toe mamao ona maea loa lea o suesuega a le Matagaluega o Leoleo o loo faagasolo e saili ai le mafuaaga o se taumafaiga a nisi o pagota i le Aso Lua o le vaiaso nei e sosola ese ma le falepuipui i Tanumalala.
Ua faailoa e le Sui Komesina o loo pulea le nofoaga le afioga Afamasaga Samuelu e tolu potu poo sela na talepe loka o faitotoa e nisi pagota talavou ma mafai ai ona o’o i fafo le lata i le to’a 40 pagota. Ua faailoa foi e le Sui Komesina o le tala mai a nisi o pagota ina ua amata suesuega na afua ona o latou faia lea gaioiga ona ua fia ō i o latou aiga ua alolofa iai ua maua nisi i le koviti-19.
Peitai ua faailoa e Afamasaga faatoa iloa uma le autū o le gaioiga pe a maea sailiiliga o loo faagasolo. O le maea o ia suesuega o le a iloa ai foi pe to’a fia pagota o le a molia i le solitulafono e fesootai i le gaioiga e le’i mafai ai ona sosola ma le falepuipui ona o le lelei o le tali atu o leoleo o le toese i le taofia o se solaaga tele e pei foi o le isi solaaga na tupu i le masina o Mati o le tausaga e 2020.
Faaalia e le Pule o le Falepuipui e leai se isi o pagota o loo tuli faasalaga mai Tanumalala ua aafia i le Koviti-19, e silia i le to’a 80 leoleo o le falepuipui poo prison guards o loo faamautū uma ma tolauapi i le nofoaga i Tanumalala talu ona amata ona tapunia Samoa.
