O le aso ananafi lea na faataunuu ai se sauniga faapitoa e manatua ai soifua auauna o nai malu o le malo e toalua lea na maliliu i le faalavelave sa lipotia atu e talafou i le vaiaso talu ai mai Kuiniselani.
O le tamaitai leoleo o Rachel McCrow ma le alii leoleo o Matthew Arnold lea na maliliu ma e tulaga ese le agai atu o tagata Kuiniselani i le faaitu o Brisbane e faailoa le latou faaaloalo ia i laua ua maliliu.
E faitau afe tagata na faatumulia ai le nofoaga na faia ai le sauniga faamanatu ae o si tamaitai leoleo o McCrow na aoga i le Bray Parks Genesis Christian College i le itu i atu i Sisifo o Brisbane ma faatoa tauto e avea ma leoleo i le tausaga talu ai.
O le alii leoleo o Arnold na aoga i le Laurences College i le itu i Saute o Brisbane ma na amata avea ma malu o le malo i le 2020.
