E le taumate o le a toatele tamaiti i le tausaga 11 e lē aooga i le asō auā o le asō lea ua faatulaga ai le solo tetee a faiaoga, secondary school teachers ma o le iuga lea o feutanaiga faaumiumi i le va o le New Zealand Post Primary Teachers Association le PPTA ma le malo ona o totogi ma tulaga o galuega.
I se faatalanoaga a le sui o le PPTA i le aso i luga o le Breakfast na ta’ua ai e Chris Abercrombie o le solo tetee i le asō o le a matuai aafia ai tamaiti aoga peitai e leai se isi option o iai mo faiaoga ma e le o se mea foi o mananao iai.
Na ia ta’ua o le faamoemoe ina ia mafai e faiaoga ona maua se maliega mautu mo le faatumauina ma le faafaigaluegaina o faiaoga.
O le faiga o solo tetee nei o lona uiga o le a eseese tausaga o le a lē iai i aoga i aso e faia ai solo tetee, o se faataitaiga i le aso o le a iai pea faiaoga i aoga peitai e le faia ni a latou aoga i tamaiti i le tausaga 11 ma o le a faapea ai lava ona fai i vaega eseese o le atunuu o loo faataunuu ai aoaoga.
Fai mai faiaoga talosia ia vave maua se tali lelei o lenei mataupu ma se ofo lelei mai le malo, a leai o le a faaauau pea nei tetee seia oo ina maua mai se tali lelei mo latou.
