Ua iai ni suiga tetele se lua ua faailoa i lipoti i le asō a le 7 news o le a faia i le Bunker mo le taamilosaga a le NRL i lenei tausaga ma ua toe faatulaga ai ma le tulafono o le grounding poo le tataoina o le polo.
Ua faaitiitia ai ma le agavaa o le video referee i le faagasologa o le taaloga. O se tasi lenei o mataupu sa gugulu ai le toatele o le au matamata i le tausaga talu ai ona o faaiuga faia o taaloga aemaise lava mai laufali o loo mataituina videos poo ata o le taaloga.
O loo ta’ua la i le asō e na o le pau le vaega e mafai ona faalavelave ane ai le video referee pe afai o se taalo le lelei, foul play.
O le a faaitiitia ai foi le taofi soo o le taaloga. O le isi suiga laititi o loo ta’ua e agai i tulafono o le tataoina o le polo i le taimi e sikoa ai, grounding, lea o le a faaaoga ai pea se sikoa pe afai e le o iloa atu se vaega o valavala ai le lima o le tagata ma le tataoina o le polo i le malae.
Fai mai sui o le NRL sa faia le latou iloiloga i le taamilosaga o le 2022 ma ua manatu ai o le a faatino loa ia suiga mo le agai i luma o le taaloga i le tausaga nei 2023.
