Ua faitioina e le pulenuu o Aukilani le tele o pili totogi a le Council, poo tupe nei e alu e totogi ai suetusi, loia ma isi galuega e pei o le faia o auala ma auala savali.
Fai mai ai Wayne Brown ua tatau i le Auckland Council ona faaitiitia tupe soona faaalu i auaunaga nei, ma e lē gata ai la i le Council ae faapea foi le malo.
O se tasi o faataitaiga na ta’ua ai e Brown le faaalu o le $900,000 e totogi ai se tasi o kamupani suetusi ma e lei faailoaina le igoa ae na ona faapea mai o se tasi o le big four, ma o lea na tāpā mo se fautuaga e faatatau i le retirement village fou.
E lei fiafia Brown i le tele o le tupe na faaalu ai, ma i lona iloa e mafai lava ona maua mai lea fautuaga i le na o le lua fagu pia e faatau ma le real estate agent e maualuga tomai ma agavaa.
Ua saunoa ai le pulenuu o lea ua faia ai se komiti faapitoa e gafa ma tupe maua faapea tupe toe faaalu a le Council, ma o lea komiti e na te iloiloina auaunaga faapea tupe a pulega taitasi a le Council.
Fai mai Brown, o se tasi lenei o mataupu na ia faailoa lava i taimi o ana faiga faatosina i le tausaga talu ai, e lē fiafia i le tele o tupe soona faaalu a le Council, ma o lana uluai paketi faalepulenuu lea ua alu ai i luga i le 7.7% tau o rates.
