O lea ua tapena e le Faalapotopotoga o Taaloga a Samoa le SASSNOC se faaaloalo e amanaia ai le au masii a Samoa i taaloga talu ai nei a Malo o le Taupulega, lea na taliu manuia mai ma pine e lima ma tu maualuga ai lo tatou atunuu i le va nonofo ai ma isi motu o le Pasefika sa ave foi a latou au taaalo.

Ua faailoa e le SASSNOC o lea faaaloalo o le a amata i se sauniga lotu faafetai ona sosoo lea ma se taumafataga.

E oo mai i le taimi nei e lei faailoaina e le Malo pe maua ni faamanuiaga tupe mo tagata taaalo a Samoa sa manumalo i pine auro, siliva ma apa memea mai taaloga a Malo o le Taupulega, e pei ona sa faia i ni tausaga ua tuanai.

E tasi le pine auro ae fa pine siliva a manumalo ai Samoa i taaloga ua mae’a nei a Malo o le Taupulega.