Ua lipotia i le One News i le asō ua faia e le Serious Fraud Office (SFO) ni moliaga i se alii mai Aukilani o loo feta’uaina sa ia tuuina ni talosaga taufaasese e faatatau i le covid 19 wage subsidy e oo atu le aofai i le 1.88miliona.
Ua lipotia mai lea tulaga i se taimi ua maitauina ai e le matagaluega o loo feagai ma lea auaunaga, le Social Development ma le tele o le mau tuua’iga e faatatau i le soona faaaogā, abuse o lenei fesoasoani ma o tuua’iga ogaoga ua tuuina atu e le Social Development i le Serious Fraud Office mo a latou su’esu’ega.
Fai mai le Ofisa e 10 isi su’esu’ega o loo faagasolo pea i le taimi nei ae o le alii o HunMin Im 33 tausaga ua feta’uaina na ia maua le 600 afe o le vaega o le 1.88 miliona lea na ia taumafai e claim faaaogā ai talosaga na ia faia e aofia ai faamatalaga sese e pei ona faailoa i se faamatalaga mai le SFO.
Fai mai le ofisa o loo latou galulue malosi nei e puipui le tulaga lelei o tamaoaiga o tagata Niu Sila ma o le gaoia o tupe a le lautele o se soligatulafono ogaoga ua aveesea mai ai tupe a le malo mai vaega o loo matuai mana’omia ai lea fesoasoani.
