A o pisapisao ai faiga faapolokiki i le faiga e tatau ona faia i telefoni feaveai a fanau aoga i taimi o aoga, o lea ua amatamea le aoga maualuga i Taranaki i suiga lelei.
O le kolisi maualuga a Waitara o lea ua faia faapitoa ato e teu ai telefoni mo le aso atoa, faatoa mafai ona toe tatala ma aumai i fafo i le tuua o aoga.
Mai le puleaoga o se faiga ua oo iai ona o le faalavelave o telefoni i taimi o vasega, ma talu mai ona faia le suiga ua iai nei ua vaaia le toatele o fanau ua mafai ona toe foi e taalo faatasi i taimi o malologa ma talatalanoa faafesagai na i lo le punonou i telefoni.
E tusa ma le 400 fanau aoga o le kolisi, ma e tusa ma le $11,000 lea e faaaluina ai e le aoga i le tausaga e faatau ai ato nei e pipii ai le sila ma e faapitoa lava foi le ki e matala ai.
O se tupe alu aogā e tusa ma saunoaga a le puleaoga ma o ai foi fanau e solia, ua iai lava foi faasalaga atoa ai ma le logoina o mātua.
