O le auaunaga e ta’ua o le Aramis Rugby o loo galulue ma le aulakapi malosi a le atunuu o Farani mo tapenaga o le Ipu o le lalolagi i le lakapi iuni i le tausaga fou, ua fai paaga nei ma le Lakapi Samoa mo le maua ai o masini ma isi vaega e koleni ai tama o le Manu Samoa.
Ua faailoa lea faigapaaga i se pepa o faamatalaga ma le fuafuaga o se sootaga tāua e fesoasoani i tapenaga a le aulakapi a le atunuu a o sauni ma tapena i le Ipu o le lalolagi e faia i Farani i le tausaga fou.
O suiga i tulafono a le pulega o le lakapi i le lalolagi i le agavaa o tama taaalo e filifili ai le atuniuu e taaalo ai, o se tasi lea o vaega tāua e pei ona faailoa e le Aramis Rugby o le faigapaaga ua faamautu nei.
Ua faaalia e le Ofisa Sili o le pulega o le Lakapi Samoa le susuga Faleomavaega Vincent Fepuleai, e le tau fesiligia o le mafutaga ma lea auaunaga tau lakapi o le a maua ai masini ma isi vaega mo toleniga a le Manu Samoa, aua o se auaunaga e maua i Farani o le a faia ai ma le taamilosaga o le Ipu o le lalolagi.
