O le finagalo faaalia o lē sa avea ma Palemia o Niu Sila i tausaga talu ai o Helen Clark, afai ae tulai mai se isi pandemic, e lē o lava saunia pea lava le lalolagi.
Ua lipotia i le Televise a Niu Sila le saunoaga lea a Clark sa faia a o avea ai ma se isi o taitaifono le Independent Panel for Pandemic Preparedness and Response i le mae’a o le fonotaga tele sa faia a le UN General Assembly.
Sa faailoa foi i le lipoti le lē fiafia o isi sui auai o le fonotaga ona o lo latou manatu lava foi lea e lē o iai i se tulaga lelei le tulituliloaina o le tautinoga poo le declaration a le Assembly ma ona sui e 193.
Fai mai Clark e tele itulau o le declaration lea ma ua talanoa e tatau ona toe faia se isi fonotaga faapea i totonu o le isi tolu tausaga.
O le faama’i o le Koviti-19 na maliliu ai le tusa ma le 24 miilona o tagata i le lalolagi ma ua faailoa e Clark o lana faalogologo atu i le tele o saunoaga o lea fonotaga, o le toatele o loo misi le autu o le fonotaga.
O mea nei o Pandemics e lē aafia ai na o se soifua maloloina, e aafia ai le mau vaega eseese o le soifua o le tagata aemaise o faigamalo.
E mautu ai le finagalo o Clark afai ae toe oso mai se isi pandemic a taeao, o le matuai lē lava saunia lava o le lalolagi e tali atu iai.
