E lē talitonu le tamaitai palemia Jacinda Ardern o iai ni mataupu tau bullying poo ni uiga fia malosi o iai i lana vaega faaupufai ae fai mai a ia o tulaga tau galuega o le a alia’e mai lea taimi i lea taimi i nofoaga faigaluega tetele. 

O le leitio faavaomalo a Niu Sila o loo lipotia ai ni faamatalaga ma tuua’iga sa faia e le faipule o le Leipa o Gaurav Sharma e pei ona lipotia i talafou i le Aso Faraile talu ai ma o loo ta’ua ai foi o se tasi faipule o le Leipa e lē o faailoaina le suafa faatasi ai ma se tagata faigaluega i le Palemene sa o la faaaogā tupe a le au totogi lafoga e ui e lē o fai mai le Parliamentary Services e faapea ua o la solia le tulafono. 

Fai mai le palemia i le lipoti lea e lē o iai se tulaga e ono faia ai se su’esu’ega i le mataupu e pei ona ta’ua e Sharma aemaise le tuua’iga e pei ona ia faia ae fai mai le palemia e tatau ona foia le faafitauli o alia’e mai ma e le’i faailoaina atu sa’o foi e Sharma ia te ia mataupu e pei ona ia ta’ua ae o loo iai auala ua faatulaga a le latou team e tali ai i mataupu faapea.