O se faai’uga mai le faamasinoga ua faailoa ai o le Meta ma le YouTube e ono iai so la sao i ni aafiaga i tamaiti, child harm.
Ua faamalosia ai ma pulega o ia kamupani, le pulega o le Facebook ma le Instagram e totogi atu ni vaegātupe i ē na o latou faamasino.
Ua lipotia e le 9News a Ausetalia o le faai’uga na faia e le vasega o faatonu i se faamasinoga i Kalefonia ina ua faamaonia sa faatamala ia kamupani i le faagaioia ma le faatulagana o a la auaunaga.
O se tama’ita’i e 20 tausaga na ia ave le matāupu i le tulafono ma lana finau e faapea o lona faaaogāina o auaunaga ia tau social media a o teineitiiti na avea ma ala ua lē mafai ai ona taofia lona fiafia i faiga faatekonolosi ma atili faatupuina ai lu’itau tau gasegase o le mafaufau mo ia, mental health struggles.
Fai mai le mau a le tama’ita’i na tagi, na amata ona ia faaaogā mai ia auaunaga faato’ā 6 ona tausaga.
O le matāupu e 9 aso na fofoga ai i le faamasinoga ma ua tuuina mai ai le faai’uga e totogi e le Meta ma le YouTube le 3 miliona tālā Amerika ae o loo ta’ua foi o isi auaunaga tau social media e pei o le TikTok ma le Snap na soalaupule a latou matāupu ma lē na tagi a o le’i amataina lea faamasinoga.
Puna o Faamatalaga: https://www.9news.com.au/world/meta-and-youtube-liable-and-negligent-for-child-harm-3-million-award/cd4c0304-d543-4e44-b7fe-1935ba8cc6aa
