O Aokuso i le tausaga ua mavae na resitalaina faaletulafono ai i luga o le faigamalo o Kuiniselani le mafutaga a le Miss Samoa Queensalnd Inc i totonu o Kuiniselani, ae o Tesema i le tausaga lava ua tuanai na faalauiloa aloaia ai i tagata Samoa i totonu lava o lea nofoaga, ma o se mafutaga ua faailoa mai lona tu ma’oti e pei ona saunoa iai le afioga i le faatonu ia Lealaitagomoa Fuimaono Silia Anae Uta’i. 

O se finagalo ua a’e i nisi o tamalii o le atunuu o loo aumau i totonu o Kuiniselani, e faapea o lea ua savali nei i le lima tausaga e lē o auai lava se sui o Kuiniselani i le sailia o se tausala poo se lalelei o Samoa i tausaga uma poo tausaga foi ua mavae atu nei. 

E fai si toatele o alo ma fanau tamaitai a Samoa o lo alala ma papaaao i totonu o Kuiniselani ae lē o mafai ona iai se latou tautua i totonu o le atunu, ae atonu e aogā le faatuina o lea faalapotopotoga ina ia mafai ai ona saili mai ai se isi tausala poo se lalelei o Samoa. 

Ua faamanino e le faatonu ia Lealaitagomoa Fuimaono Silia Anae Uta’i, e ese lava le Miss Samoa Ausetalia, e ese foi le Miss Samoa Queensland Inc. 

O le Miss Samoa Queensland Inc e fou le mafutaga, fou le resitalaina e fou foi ona sui faavae. 

O le manulauti poo le anavatau o loo taumafai iai le Miss Samoa Queensland Inc, o le taumafai lea e faamamaluina ma faamalosia tamaitai Samoa ina ia tausia le tatou aganuu ia faaolaola pea, ma ia faaosofia lagona i fanau e ave le mamalu i le tatou aganuu e ala lea i le faatāuaina o le gagana, o le tu ma le aganuu faapea ma le faakerisiano. 

Auā e iai le talitonuga o mea ia, o measina a le atunuu a o mea foi ia ua iloa ai Samoa i le lalolagi atoa. 

O polokalame i totonu o Kuiniselani e fai lelei lava le sailiga o le latou tausala e tusa ai ma auala ma aiaiga o loo faataunuuina ai lenei faamoemoe, afai ae maua loa se tausala a Kuiniselani ona sauni loa lea mo le faamoemoe o le atunuu ia Setema lea e sailia ai se lalelei o Samoa. 

Ua tatala le avanoa i mātua i totonu o Kuiniselani e auai atu ai ma avatu o latou fanau i lenei mafutaga auā o lea ua lava tapena le faalapotopotoga e saunia mea uma auā faamoemoe o fanau, ma ia faailoa pea i fanau lo latou siosiomaga ma lo latou tupuaga. 

O le aso 23 o Mati o lea ua fuafua le komiti faafoe o le Miss Samoa Queensland Inc e fai ai se latou aso faapitoa e tatala ai le avanoa mo aiga ma fanau e susū atu ai e resitala ma faalogologo i nisi o vaega o lea ua fuafua iai le komiti mo le faagasoloina o polokalame auā le agai i luma o le faamoemoe, ae o le a faailoa foi i lea aso tulafono o le a iai auā le sailia o se lalelei mo Kuiniselani.