Ua faaulufale nei i le tauaofiaga a le Palemene o lenei masina o Aokuso teuteuga o le Tulafono Faavae ma le Tulafono o Faamasinoga o Fanua ma Suafa 2020, i le faamoemoe o le Malo e toe suia ai nisi o vaega autū o le tulafono na pasia e le Palemene i le tausaga e 2020, lea ua lua ai pulega o le Faamasinoga a le atunuu.
O tapenaga mo ia teuteuga fou ua faaulufale i le Fono Aoao Faitulafono sa galulue ai le matagaluega o faamasinoga ma le faafoeina o mataupu tau faamasinoga i masina ua tuanai, lea sa faatalatalanoa ai le atunuu ma aoao manogi ai i finagalo eseese o tagata na faaalia i ia faatalatalanoaga.
O teuteuga o le Faavae ina ia avanoa ai ona faatino suiga o loo fautuaina, e manaomia ai le finagalo fulisia o sui mamalu o Itumalo palota i le Palemene poo le 2 vae 3 o nofoa e 51, pe afai e faatino se palota faalilolilo.
