E 26 tausaga o le tamaitai o Raewyn Laumatafiafia Imelda Madeliene Fong ua mae’a ana a’oa’oga i le Iunivesite o Aukilani ma ua faai’uina ma le manuia i tomai ma agavaa i le tautua faaloia.

O se vaiaso e le’i mamao atu na faaulufale ai ma talia i galuega a le faamasinoga i Niu Sila, ae o le Aso Lulu o le vaiaso nei na faaulufale ai ma talia e tautua o se loia i le Faamasinoga Maualuga a Samoa.

Sa a’oa’oina o ia i le a’oga tulagalua a le Samoa Primary, sosoo ai le Kolisi o Samoa, faaauau i le Iunivesite Aoao o Samoa, ma malaga ai i Niu Sila e faalautele atili ana a’oa’oga i le Iunivesite o Aukilani lea ua maua ai ona faailoga loia. 

O le ogatotonu o lenei vaiaso na faia ai le sauniga faapitoa i le potu faamasino numera tasi o le faamasinoga sili a le atunuu i Mulinuu, sa ta’ita’i e le afioga i le Faamasino Sili, Afioga Satiu Simativa Perese sa faaulufale ma talia ai le tamaitai loia o Raewyn.

Sa auai foi le tamaitai Loia Sili a le Malo ma le vasega o alii ma tamaitai loia o loo galulue ai, faapea nisi o loia o loo galulue i auaunaga tuma’oti.

Ua fai i lagi le malaga a lona tuaa tamā, ma o si ona tuaa tinā, Afioga Lemalu Falenaoti Madeleine Fong sa auai atu faapea ona aiga ma uo.

O le ofisa o le Loia Sili a le Malo o le a galue ai le tamaitai loia o Raewyn Laumatafiafia Imelda Madeleine Fong, ma o ia e mai afioaga o Apia, Faleapuna, Leauvaa ma Tiapapata.