Ua faitau vaiaso foi mae’a Aokuso ma e lē o toe tele se taimi o tapenaga o polokalame o faafiafiaga o le 60 tausaga o le Tuto’atasi i le masina fou o Setema.
O lea ua faailoa e le komiti o tapenaga le tauvaga o taavale teuteuina mo lea faamoemoe, ma le faanaunauta’iga o le komiti ia lesitala atu e ni nuu ma afioaga poo faalapotopotoga foi ni latou taavale e teuteu faamatagofie e faamatala ai le 60 tausaga o le malo tuto’atasi o Samoa.
O nisi o polokalame mo lea faamoemoe ia Setema e lei faailoaina mai, ae o loo iai le talitonuga o faafiafiaga o pese ma siva faaleaganuu o nisi ia o faafiafiaga o le a silasila ma maimoaina e le atunuu. O le vaiaso tonu o le Teuila e faagasolo ai ia polokalame o faafiafiaga.
