Ua tuu atu nei i luma o le faamasinoga le talosaga o se tagi faasaga i le Matagaluega o Leoleo, Falepuipui ma le Ola Toe Fuataina e mafua i le faasalaga faafalepuipui o le tamā na tuli mulimuli ane faatoa iloa ua leva ona tatau ona magalo ae o loo nofosala pea i le toese i le umi e lata i le 5 tausaga.
O le tama ia Sio Galo Agafili na faasala i le 5 tausaga i le falepuipui i le tausaga e 2008 ma i le maea ona tuli e afa o lana faasalaga na talosaga ai Ie komiti o le palola pe magalo ai i tua peitai e le’i taliaina lana talosaga ma faaauau ai pea seia oo ina maea le 5 tausgaa i le tausaga e 2013.
E iai seisi moliaga na molia ai ona o se solitulafono na ia faia i totonu o le Falepuipui ma sa faatonuina ai e tuliese lona faasalaga lea. Peitai na maea lea faasalaga ae sa nofo ai pea i le falepuipui ma lona manatu e le’i maea.
O le tausaga a mavae ina ua toe tulai i luma o le faamasinoga i moliaga o le faaoolima e mafua i le solaaga tele a pagota na iloa ai ua leva ona tatau ona magalo ma faaaoga ai loa e le faamasinoga aiaiga faaletulafono na faatonuina ai le tatala i tua ma le falepuipui o Sio Galo Agafili.
O le su a lea tama faasaga i le Matagaluega o Leoleo, Falepuipui ma le Ola Toe Fuataina ua toe tolopo i le masina fou e fai ai se soalaupulega i se taui tupe e totogi e le Matagaluega i le tama ia Sio.
