O tuuaiga o le ave o tupe ma le faia o ni gaioiga faaalatua e ala i le ave o taumafa ma vaiinu i tagata palota ma le faamoemoe e faatosina ai tagata palota o loo tuuaia ai e Samau Leatigagaeono Solitamalii Timani le sui a le vaega faaupufai a le FAST o Lautimuia Uelese Vaai lea na manumalo i le faigapalota laititi a Vaimauga 3 i le masina na sei mavae atu nei.
Ma ua iai lipoti e faapea, i le aso 17 o le masina ua mavae i se faatasiga sa faatautaia i Magiagi na foai ai e le vaega faaupufai a le FAST faapea ai ma paaga uma a le latou sui se seleni e $5,000 tala i le afioaga ma le faamoemoe e unaia ai palota a i latou uma sa auai i lea aso.
E le gata i lea, ae na tapena foi e le aiga o le sui tauva, taumafataga ma vaiinu mo tagata uma sa auai i lea faatasiga.
E tusa ai ma lipoti o loo finauina e Samau le tatau ona tapu le toe tauva o le sui a le FAST i le isi faigapalota, ma e tatau foi ona toe foi le itumalo e toe fai le faigapalota.
O le aso 21 o le masina nei ua poloaia ai e le faamasinoga le loia a le itu tetee e tuu atu ai la latou tali tetee i tuuaiga uma, ae o le aso 25 o le masina nei lava e avatu ai le tali a le itu tagi i le tali a le itu tetee.
O le aso 30 o le masina nei o le a toe valaau ai lea mataupu ma faamautu ai loa se aso e iloilo ai nei tuuaiga.
